Vill senda sundlaugarverði á námskeið

Gæsla á sundstöðum þarf að miðast við fjölda gesta en ekki stærð lauganna. Þetta segir Herdís Storgaard, forvarnarfulltrúi barna. Hún vill að sundlaugarverðir fái menntun og þurfi að sækja sérstakt námskeið til að verða sundlaugarverðir.

Herdís segir að í gegnum tíðina hafi mikið verið unnið í þeim málaflokki sem snýr að slysum barna í sundlaugum. „Það hefur orðið mikil fækkun í drukknunarslysum barna í sundlaugum," segir hún en þykir miður að enn heyrist af tilvikum þar sem barn er hætt komið, líkt og gerðist síðasta föstudag þegar drengur barðist um undir vatnsborði í sundlaug í næstum þrjár mínútur.

Herdís var í viðtali í Reykjavík Síðdegis á Bylgjunni. Þar veltir hún því fyrir sér hvort öryggiskerfið í sundlaugum sé nógu gott. „Það voru náttúrlega gestir sem fundu barnið í stað þess að það séu gæsluaðilar sem ráðnir eru til að gæta að sundlaugargestum," segir hún.

Gæsla á sundstöðum þarf að hennar mati að miðast við fjölda gesta. „Ég myndi vilja sjá þetta eins og í Bretlandi. Þar hefur laugin bara leyfilegan fjölda gesta. Með hverjum 250 gestum er nýr laugarvörður kallaður til vinnu. Það segir sig sjálft að þegar eru margir gestir þá þurfa fleiri að vera á vakt," segir hún.

Herdís vill sjá menntun fyrir sundlaugarverði. „Þeir hafa sjálfir óskað eftir því í mörg ár. Það eru til drög að námsskrá fyrir sundlaugarverði. Ég vil sjá það verða að veruleika í vetur,“ segir hún.

Loks minnir hún á að þó gæsla í sundlaugum þurfi að vera pottþét beri foreldrar samt ábyrgð á börnum sínum. „Þegar börn eru ekki synd þá má bara ekki líta af þeim," segir hún og biður fólk að nota þá kúta og flotbúnað sem liggur frammi á sundstöðum.