Óttast að skilaboð um árangur rati ekki til almennings

Forystufólk í Vinstri grænum hefur sérstakar áhyggjur af því að skilaboð um góðan árangur ríkisstjórnarinnar rati ekki til kjósenda. Steingrímur J. Sigfússon, formaður flokksins, telur ástæðuna aðallega vera neikvæðni og hörku í opinberri umræðu.

Steingrímur J. Sigfússon, Katrín Jakobsdóttir, Hildur Traustadóttir og Sóley Tómasdóttir sendu í síðustu viku bréf til flokksmanna þar sem þau fara yfir stöðu mála í íslensku samfélagi eins og hún kemur þeim fyrir sjónir að loknu stormasömu þingi.

Fjórmenningarnir segja að eftir tæpt ár verði kosningar til Alþingis. Í þeim munu Vinstri grænir leggja verk sín í dóm kjósenda og segjast þau ekki kvíða þeim dómi ef umræðan verði málefnaleg og byggð á staðreyndum, en ljóst sé að það muni kosta mikla baráttu að koma upplýsingum um þá hluti til skila.

Allt kjörtímabilið hafi ríkisstjórnin þurft að glíma við harðdræga sérhagsmunagæslu og áróður gömlu valdaklíkanna í landinu þar sem engin takmörk hafi verið virt.

Af þessu verður ekki dregin önnur ályktun en að forystufólk í VG óttist að réttar upplýsingar komist ekki til skila og fjölmiðlar séu á móti þeim.

„Við eigum bara við það að almennt hefur umræðan verið mjög þung og neikvæð hér og svona tilhneiging til að tala árangur og góðar fréttir frekar niður en hitt. Það er ekki við neinn einn að sakast í þeim efnum. Þjóðmálaumræðan hér hefur verið neikvæð, þung. Við erum enn í vissum sárum eftir hrunið. Og þess sér stað. Fólk er tortryggið og kannski ekki alveg tilbúið til að miðla eða trúa góðum fréttum þegar árangurinn er farinn að sýna sig. Og fyrir þessu hefur maður fundið að undanförnu," segir Steingrímur.

Hann segir að þetta hafa samt skánað mikið. Flokkurinn eigi hins vegar í vök að verjast, enda hafi ríkisstjórnin þurft að ráðast í erfið og stundum óvinsæl verkefni.

„Við höfum auðvitað bundið vonir við að eftir því sem árangurinn kemur betur í ljós þá sjái fólk að það sem við vorum að gera var nauðsynlegt og það er að skila árangri. Og það er eftir því sem við vorum að bíða," segir Steingrímur.