Enginn sáttatónn og skip enn við bryggju

Sjávarútvegsráðherra segir aðgerðir LÍÚ ekki koma til með að hafa áhrif. Hann hafi aldrei hafnað því að ræða við útvegsmenn. Framkvæmdastjóri LÍÚ neitar að um lögbrot sé að ræða og kallar eftir því að málið verði leyst í breiðri sátt.

Skipafloti meðlima Landssambands íslenskra útvegsmanna (LÍÚ) liggur enn við bryggjur landsins í mótmælaskyni við frumvörp til laga um stjórn fiskveiða og veiðigjöld. Formaður LÍÚ biður um lausn í sátt við hagsmunaaðila og sérfræðinga, en sjávarútvegsráðherra segir útvegsmenn hafa haft tækifæri til að koma sínum skoðunum á framfæri.

„Ég kannast hvorki við að hafna því að hitta útvegsmenn né ræða við þá,“ segir Steingrímur J. Sigfússon og segir útvegsmenn hafa haft fullan aðgang að ferlinu.

„Ég læt ekki stjórnast af þrýstingi af þessu tagi og læt menn hvorki njóta þess né gjalda þó þeir fari út í aðgerðir sem mér finnst sjálfum orka tvímælis.“

Um lögmæti aðgerðanna segir Steingrímur að um það megi deila. Forsætisráðherra sagði á þingi í gær að þær brytu í bága við lög. Í tilkynningu frá ASÍ er tekið undir þau sjónarmið.

Friðrik J. Arngrímsson, framkvæmdastjóri LÍU, neitar að um lögbrot sé að ræða.

„ASÍ vísar í lagagrein sem fjallar um vinnustöðvun, sem væri verkbann í okkar tilfelli. En þetta er ekki verkbann eða vinnustöðvun í skilningi laganna. Ef við förum í verkbann, sem ég vona að komi aldrei til, þá mun það snúa að sjómönnum og starfsfólki, en það er einmitt það sem við erum að reyna að koma í veg fyrir. ASÍ er að snúa hlutunum á hvolf. Ég held að þau ættu frekar að koma við hlið okkar í þessu máli til að verja hagsmuni launafólks.“

Steingrímur segir frumvörpunum alls ekki stefnt gegn hagsmunum launafólks. „Málið snýst fyrst og fremst um sameign á auðlindinni og að eðlilegt afgjald sé greitt af henni.“

Aðspurður um frekari aðgerðir af hendi LÍÚ segir Friðrik að sú ákvörðun bíði seinni tíma.

Hann segir útgerðarmenn vilja að lög um stjórn fiskveiða verði unnin í samstöðu atvinnugreinarinnar, stjórnmálaflokkanna og sérfræðinga, „á vandaðan og yfirvegaðan hátt“.thorgils@frettabladid.is