698 eignir Íbúðalánasjóðs auðar

Íbúðalánasjóður átti þann 20. febrúar síðastliðinn alls 1.751 íbúð. Af þeim voru 804 íbúðir áður í eigu einstaklinga en 947 áður í eigu lögaðila. Alls eru 707 af íbúðunum í útleigu en 698 standa auðar. Þá eru 255 eignir óíbúðarhæfar og 91 eign nýkomin í eigu sjóðsins og því enn flokkuð sem í vinnslu.

Þetta er meðal þess sem kom fram í svari Guðbjarts Hannessonar velferðarráðherra við fyrirspurn Guðlaugs Þórs Þórðarsonar, þingmanns Sjálfstæðisflokksins, á Alþingi um íbúðaeign Íbúðalánasjóðs. Fyrirspurn Guðlaugs var lögð fram þann 13. febrúar en svarið barst á mánudag.

Sé litið til landshluta eru flestar eignir á Suðurnesjum eða 529 talsins. Á höfuðborgarsvæðinu á Íbúðalánasjóður 340 eignir, á Suðurlandi 260 eignir og á Vesturlandi 244 eignir. Þá á sjóðurinn 224 eignir á Austurlandi, 114 á Norðurlandi og 39 á Vestfjörðum.

Af póstnúmerum skera póstnúmer 230 og 260 í Reykjanesbæ sig úr en Íbúðalánasjóður á samanlagt 404 eignir í póstnúmerunum. Þá á sjóðurinn 109 eignir í póstnúmeri 800 í Árborg, 105 eignir í póstnúmeri 730 í Fjarðabyggð og 91 eign í póstnúmeri 300 á Akranesi.- mþl