Býður til viðræðna um þjóðarsátt um nýjan gjaldmiðil

Jóhanna Sigurðardóttir forsætisráðherra býður öllum flokkum á Alþingi að setjast niður til viðræðna um þjóðarsátt um nýjan gjaldmiðil. Þetta kom fram á Alþingi nú laust fyrir hádegi.

Ummæli forsætisráðherra á flokkstjórnarfundi Samfylkingarinnar um síðustu helgi, um að íslenskan krónan væri ónothæf, urðu framsóknarmönnum tilefni til umræðna en Birkir Jón Jónsson kvaðst fullyrða að hvergi kæmist forsætisráðherra upp með slík ummæli án þess að það hefði einhver eftirmál í för með sér. Birkir Jón sagði þetta gáleysileg orð sem myndu enn veikja tiltrú manna á krónunni og gera það enn erfiðara að aflétta gjaldeyrishöftunum.

Jóhanna Sigurðardóttir forsætisráðherra sagði framsóknarmenn í afneitun gagnvart krónunni en þeir væru þó á réttri leið með því að halda ráðstefnu um nýjan gjaldmiðil. Með því væru þeir að viðurkenna að óbreytt ástand gengi ekki og það væri fyrsta leiðin út úr afneituninni.

„Ég býð það hér með fram að alllir flokkar á þingi reyni að setjast yfir þetta mál í ró með því hugarfari að gera það sem er skynsamlegast fyrir þessa þjóð. Við þurfum þjóðarsátt um nýjan gjaldmiðil," sagði Jóhanna.

Allt annað myndi skapa mikla erfiðleika fyrir einstaklinga og fyrirtæki í landinu. Þetta væri stærsta framtíðarmál þessarar þjóðar að skapa þjóðarsátt um nýjan gjaldmiðil.