Tveir fangar komnir með ökklabönd - kostnaðurinn mun minni

Tveir íslenskir fangar hafa nú fengið ökklabönd sem gera þeim kleift að ljúka afplánun heima undir rafrænu eftirliti. Fangelsismálastofnun áætlar að hafa slíkt eftirlit með níu föngum að tveimur mánuðum liðnum.

Fyrsti fanginn fékk ökklaband um miðjan síðasta mánuð. Annar fékk band í gær, tveir til viðbótar fá tæki í þessum mánuði og fimm í apríl.

Fangarnir verða að sækja vinnu eða skóla og eru skikkaðir til að vera heima hjá sér á fyrirfram ákveðnum tíma.

„Á virkum dögum geta menn farið út klukkan sjö á morgnana og þeir eru komnir heim til sín aftur klukkan sex og eru heima hjá sér á milli sex og sjö. Klukkan sjö geta þeir farið út og verið til ellefu. Á laugardögum og sunnudögum geta þeir farið út klukkan sjö á morgnana og verða að vera komnir heim klukkan níu um kvöldið og fara ekki út eftir það," segir Erlendur S. Baldursson, afbrotafræðingur hjá Fangelsismálastofnun.

Böndin segja til um hvort fangarnir séu heima eða ekki, en undir þessu eftirliti mega þeir ekki bragða dropa af áfengi né neyta vímuefna.

„Það er tékkað á því með því að taka þvagprufu eða láta menn blása í áfengismæli. Það er hægt að kalla menn inn í fangelsi og biðja um slíkar prufur."

Fangelsismálastofnun hefur tekið tíu tæki á leigu og verður þeim fjölgað eftir þörfum. Þau eru lítil, fislétt og endast í mörg ár. Einungis fyrirmyndafangar fá tækifæri til að afplána hluta síns dóms undir rafrænu eftirliti og því vonast Erlendur til að það hvetji fanga til að hegða sér vel enda til mikils að vinna.

„Þetta kostar svona einn tíunda af því sem fangelsisdvöl kostar," segir Erlendur að lokum.