Flóðavarnir New Orleans héldu að mestu

Betur fór en áhorfðist þegar fellibylurinn Ísak reið yfir borgina New Orleans í gær. Versta veðrið fór raunar rétt framhjá borginni og allar flóðavarnir hennar fyrir utan eina héldu.

Gat kom á flóðvarnarvegg í suðurhluta borgarinnar og þar þurfti að bjarga nokkrum tugum manna en sú björgun gekk mjög vel.

Aðeins er vitað um eitt dauðsfall vegna Ísaks í New Orleans en til samanburðar fórust yfir 1.500 manns þegar fellibylurinn Katrina skall á borginni fyrir réttum sjö árum síðan.

Útgöngubann hefur verið í  gildi í New Orleans í nótt vegna Ísaks.

Verulega dró úr styrk Ísaks í gærkvöldi en mikið úrhelli sem fylgt hefur honum hefur m.a. valdið því að um 600.000 manns eru nú án rafmagns í Louisiana og fjórum öðrum ríkjum.