Sýningum The Dark Knight Rises frestað víða

Stórleikarinn Christian Bale, sem fer með hlutverk Leðurblökumannsins í The Dark Knight Rises, sagði í dag að orð gætu vart lýst þeim harmleik sem átti sér stað í Colorado í gær.

James Holmes, 24 ára gamall doktorsnemi, myrti 12 manns og særði 59 á kvikmyndasýningu í bænum Aurora í gær. Atvikið átti sér stað á forsýningu The Dark Knight Rises en hennar hefur verið beðið með gríðarlegri eftirvæntingu.

„Ég mun aldrei skilja þann sársauka sem fórnarlömbin og aðstandendur þeirra upplifa nú, en ég votta þeim samúð mína," sagði Bale.

Kvikmyndaverin Sony, Fox, Disney, Universal, Fox, Paramount og Lionsgate tilkynntu í dag að þau myndu fylgja í spor Warner Bros., framleiðanda The Dark Knight Rises, og fresta því að birta sölutölur fyrir helgina.

Er þetta gert í virðingarskyni við íbúa Aurora í Colorado.

Þá hefur Warner Bros. frestað frumsýningu The Dark Knight Rises í París, Mexíkó og Japan. Til stóð að allar helstu stjörnur kvikmyndarinnar yrðu viðstaddar sýningarnar.

Fyrirtækið hefur einnig tekið stiklu úr glæpamyndinni Gangster Squad úr sýningu. Í henni mátti sjá atriði þar sem nokkrir menn skjóta á kvikmyndahúsagesti.

Fyrr í dag sagði Christopher Nolan, leikstjóri og framleiðandi myndarinnar, vottaði íbúum Aurora samúð sína og allra þeirra sem komu að gerð The Dark Knight Rises.