Eðlilegt að taka eitt skref í einu

Unnið var að því í gær að stofna íslenskt félag í eigu fjárfestingafélags kínverska athafnamannsins Huangs Nubo, segir Halldór Jóhannsson, umboðsmaður Huangs á Íslandi.

Stofnun félagsins er forsenda þess að viðræður við stjórnvöld um gerð ívilnunarsamnings geti hafist. Aðeins með gerð slíks samnings getur félagið fengið undanþágu frá lagaákvæðum sem banna félögum í eigu erlendra einstaklinga eða fyrirtækja að leigja land til langs tíma hér á landi.

Halldór segir að ákveðið hafi verið að taka eitt skref í einu við undirbúnings þessa máls eftir því sem málinu vindur fram. Nú sé kominn tími til að stofna félag Huangs hér á landi, sem hafi ekki verið tímabært fyrr en stjórnvöld hafi lýst áhuga á að gera ívilnunarsamning.

Huang áformar að leigja jörðina Grímsstaði á Fjöllum til 40 ára af félagi í eigu sveitarfélaga á svæðinu. Þar áformar hann að byggja upp hótel og ferðatengdan rekstur. Til stendur að leggja um 16,5 milljarða króna í verkefnið, og stefnt er að því að hótelið verði tilbúið árið 2016. - bj