Kærður fyrir skemmdaverk - vildi mótmæla úthlutun byggðakvóta

Sjómaður hefur verið kærður til lögreglunnar á Húsavík eftir að hann á að hafa kastað 40 kílóa steinsteyptu blómakeri í bifreið í eigu Sveitarfélagsins í Norðurþingi. Rúða og vélarhlíf bifreiðarinnar, sem er af gerðinni Suzuki, skemmdust þegar kerið hafnaði á bílnum. Skemmdarverkið átti sér stað á Kópaskeri.

Samkvæmt upplýsingum frá lögreglunni á Húsavík er hér um að ræða flóknar deilur á milli sjómannsins og sveitarfélagsins. Þannig heldur sjómaðurinn því fram að sama bifreið hafi valdið skemmdum á bát sem hann á. Auk þess sem hann vill mótmæla úthlutun byggðakvóta eins og fram kemur í DV í dag. Hann hefur ekki játað verknaðinn.

Maðurinn hafði áður sent bæjarstjórn bréf þar sem hann lýsti yfir þessum sjónarmiðum.

Samkvæmt upplýsingum frá lögreglu þá verður málið rannsakað og í kjölfarið mun það rata sína venjubundnu leið innan dómskerfisins.