Farið fram á sex ára fangelsi - fórnarlambið minnislaust

Farið var fram á sex ára fangelsisdóm yfir Kristjáni Halldóri Jenssyni í Héraðsdómi í morgun fyrir tilraun til manndráps þegar hann beitti afsagaðri haglabyssu í átökum í Bryggjuhverfinu í Reykjavík í nóvember í fyrra. Aðalmeðferð í málinu lauk nú laust fyrir hádegi.

Saksóknari kvaðst telja þriggja ára fangelsisdóm hæfilegan fyrir Tómas Pálsson Eyþórsson og Axel Má Smith sem gefið er að sök að hafa tekið þátt í árásinni.

Borið hefur verið fyrir dómi að málið eigi sér rætur í deilum við annað fórnarlamb árásarinnar vegna meintra skulda Tómasar við hann. Mennirnir segja ætlan sína hafa verið að hræða fórnarlambið, ekki vinna honum mein.

Fórnarlambið var fært fyrir dóm í morgun eftir að hafa skrópað í gær. Fyrir dóm bar viðkomandi svo við algjöru minnisleysi um nær alla þætti málsins, þar á meðal um skýrslugjöf sína hjá lögreglu strax eftir árásina, en henni lauk þegar seinna skotið hæfði bíl fórnarlambsins eftir eltingarleik um bæinn.

Þegar dómari átaldi manninn vegna meints minnisleysis spurði hann á móti hvort að dómari hefði lent í því að skotið hafi verið á hann. Maðurinn kvað áfallið vegna árásarinnar hafa haft áhrif á minni hans, en þegar hann var spurður hvort kæran sem hann lagði fram hjá lögreglu væri röng, svaraði hann ekki öðru en að hann hefði ekki fyrir sið að ljúga. Í fyrradag bar réttargæslumaður fórnarlambs árásarinnar fyrir dómi að hann hefði fallið frá öllum skaðabótakröfum í málinu og það staðfesti hann fyrir dómi í gær. Ekki liggja fyrir skýringar á þeim sinnaskiptum. Hinn maðurinn sem var í bílnum sem skotið var á gerir 1,2 milljóna króna skaðabótakröfu vegna árásarinnar.

Verjendur mannanna þriggja hafa allir krafist sýknu vegna manndrápsákærunnar. Telja þeir í mesta lagi hægt að heimfæra ákærur upp á ákvæði laga um að hafa skapað öðrum hættu.