Góð ferilskrá skiptir sköpum í ráðningarferlinu

Atvinnuumsóknir upp á tugi blaðsíðna eru ekki vænlegar til árangurs í atvinnuleit, segir ráðgjafi hjá Capacent. Góð ferilskrá er lykillinn að því að fólk komist áfram á ráðningarferlinu þegar samkeppni er mikil.

Samkvæmt tölum sem vinnumálastofnun birti í dag voru ellefu þúsund og sexhundruð einstaklingar að meðaltali atvinnulausir í febrúar síðastliðnum. Atvinnuauglýsingum hefur fjölgað umtalsvert á síðustu mánuðum en oft eru tugir ef ekki hundruðir umsækjenda um hvert starf.

„Fólk fer af stað án þess að vita hvað það vill það eru fyrstu mistökin og svo vandar það ekki nógu vel ferilskrár og á tímum sem samkeppni er mjög mikil þá þarf umsóknin að vera mjög góð til að komast áfram í ferlinu," sagði Jónína Guðmundsdóttir, ráðgjafi hjá Capacent.

Jónína er einn af höfundum bókar þar sem farið er fyrir ráðningarferlið frá upphafi þar sem bent er á ýmis mistök sem fólk gerir oft þegar það sækir um störf. Hún segist hafa séð margar misgóðar ferilskrár en þær verstu eiga það oft sameiginlegt að vera of ítarlegar og óskipulagðar, jafnvel í samfelldum texta svo erfitt er að finna þær upplýsingar sem leitað er að.

„Það er mjög slæmt þegar maður fær ferilskrár uppá tugi blaðsíðna eða margar langar umsóknir og líka þegar fólk hefur ekki upplýsingar um hvar er hægt að ná í það, engin símanúmer eða netföng og þá er erfitt að ná í viðkomandi," sagði Jónína.

Þannig ferilskrár eru oft fyrstar til að lenda í ruslinu og því mikilvægt að vanda til verks.