Ráðast líklegast í átak fyrir sumarstörf

Allt útlit er fyrir að ráðist verði í sérstakt átak vegna sumarstarfa ungmenna þetta árið. Nauðsynlegar aðgerðir að mati formanns stúdentaráðs Háskóla Íslands.

Velferðarráðuneytið og Vinnumálastofnun auglýstu í fyrra 900 sumarstörf um allt land í átaki til að fjölga störfum á vegum ríkisins og sveitarfélaga en störfin voru ætluð námsmönnum og atvinnuleitendum. Vinnumálastofnun hefur áhuga á að ráðast í álíka verkefni þetta sumarið og hefur lagt inn umsókn til Velferðarráðuneytisins þess efnis og bíður nú svara.

Sara Sigurðardóttir formaður Stúdentaráðs Háskóla Íslands segir að flestir stúdentar séu nú þegar farnir að leita sér að sumarvinnu. „Það er að sjálfsögðu örugglega stórt hlutfall af nemendum sem ekki er kominn með svör eða vinnu þannig að eitthvað átak frá einmitt Velferðarráðuneytinu er bara nauðsyn," segir Sara.

Ráðið hefur í hyggju á að verðlauna það fyrirtæki sem réði flesta stúdenta á síðasta ári og önnur verðlaunaafhending er fyrirhuguð. „Við ætlum að verðlauna það fyrirtæki eða stofnun sem mun ráða til sín flesta stúdenta í sumar og setja okkar krafta á bak við það að koma sem flestum stúdentum í sumarstörf segir Sara Sigurðardóttir, formaður Stúdentaráðs. Atvinnuleysi í síðasta mánuði mældist 7,3% samkvæmt nýjum tölum Hagstofu Íslands. Atvinnulausum hefur fækkað um 1100 frá febrúar í fyrra en þá voru atvinnulausir 13.700 eða ræplega 8% vinnuaflsins.