Innlent

Áform um þyrlumiðstöð Drekasvæðis mæta andstöðu

Andstaða landeiganda við Þórshöfn, gegn því að þyrlumiðstöð Drekasvæðisins verði á jörð hans, veldur því að sveitarfélagið Langanesbyggð hefur ekki fengið staðfest aðalskipulag sem gerir ráð fyrir risahöfn og olíu- og gasiðnaði.

Það eru raunar sjö ár liðin frá því stórskipahöfn í Gunnólfsvík fór inn á aðalskipulag Skeggjastaðahrepps, sem nú er hluti Langanesbyggðar, en ráðamenn þar hafa síðan reynt að fá athafnasvæðið stækkað. Eftir að Skipulagsstofnun gerði þá afturreka í fyrra með skipulag sem gerði ráð fyrir risahöfn og alþjóðaflugvelli ákvað sveitarstjórnin í vor að koma til móts við gagnrýni með nýju aðalskipulagi, sem í haust var sent Skipulagsstofnun til staðfestingar.

Þar er búið að minnka athafnasvæði flugvallarins, frá því sem áður var áformað, og draga úr umfangi iðnaðarsvæðis við Finnafjörð, en áfram þó stefnt að stærstu höfn Íslands. Fallið er frá því að gera einu byggðu jörðina við fjörðinn, Fell, að iðnaðarlóð.

Guðmundur Vilhjálmsson, eigandi Syðra-Lóns við Þórshöfn, er hins vegar á góðri leið með að gera stóru draumana að engu. Sjálfur á hann landið við Þórshafnarflugvöll og fékk aðra landeigendur í lið með sér í andstöðunni.

Guðmundur segir að þessi bæklingur sem félagið Dreki Area gaf út, hafi sérstaklega hleypt illu blóði í landeigendur þegar þeir sáu að byrjað var, að þeim forspurðum, að auglýsa land þeirra undir olíuhreinsistöð og umskipunarhöfn fyrir siglingar yfir Norðurheimskautið, með ljósmyndum af jörðunum við hliðina á gas- og olíuskipum. Guðmundur hafnar því að þyrlumiðstöð verði á landi sínu við Þórshöfn og telur að meiri verðmæti felist í ósnortnum víðernum.

Atvinnuvegaráðuneytið styður sjónarmið Guðmundar um að landið verði ekki tekið úr landbúnaðarnotkun án samþykkis landeigenda og Skipulagsstofnun hefur nú ráðlagt sveitarfélaginu að taka þyrlumiðstöðina út.


Tengdar fréttir

Kínverjar vilja fjárfesta í umskipunarhöfn á Íslandi

Kínverjar hafa rætt við íslensk stjórnvöld um að byggja hafnarmannvirki á Íslandi vegna siglinga yfir Norðurskautið. Þetta upplýsir Össur Skarphéðinsson utanríkisráðherra en á ráðstefnu í dag sagði hann mestu viðskiptatækifæri Íslendinga á þessari öld tengjast heimskautasvæðunum. Salurinn á Grand hótel Reykjavík var þéttsetinn á ráðstefnu sem utanríkisráðuneytið, Samtök atvinnulífsins og Íslandsstofa efndu til um sóknarfæri á norðurslóðum.

Norðmenn skoða Ísland sem þjónustumiðstöð olíuleitar

Norðmenn gera í nýrri skýrslu um olíuleit á Noregshluta Jan Mayen-hryggjarins ráð fyrir þeim möguleika að þjónustunni verði sinnt frá Íslandi. Þrefalt lengra er að þjónusta borpalla frá Noregi. Það eru ekki bara Íslendingar sem áforma olíuleit á Jan Mayen-svæðinu. Norðmenn eru einng komnir á fullt við að undirbúa leit sín megin og miðað við þann kraft sem þeir hafa nú sett í málið gæti svo farið að þeir verði fyrri til að hefja boranir á svæðinu, jafnvel árið 2017.

Lifum ekki á fjallagrösum - þurfum alvörustörf

"Þegar við sjáum tækifærin hérna þá er svo einkennileg árátta hjá fólki að vilja að fara að vernda allt fyrir okkur," sagði Þórunn Egilsdóttir, oddviti Vopnafjarðarhrepps, í þættinum "Um land allt" á Stöð 2 í gærkvöldi. Kristján Már Unnarsson heimsótti Þórunni og eiginmann hennar, Friðbjörn Hauk Guðmundsson, en þau búa á bænum Hauksstöðum í Vesturárdal í Vopnafirði ásamt þremur börnum sínum.

Sækja olíurisarnir um Austur-Grænland?

Á næstu dögum skýrist hvort stærstu olíurisar heimsins verða í hópi þeirra sem sækja um olíuleit við Austur-Grænland, - beint norður af Íslandi. Nærri þrjátíu íslensk fyrirtæki og stofnanir búa sig undir að ná þjónustuverkefnum. Margir spá því að ekki aðeins Drekasvæðið verði stórt fyrir Ísland, það verði einnig olíusvæðin við austurströnd Grænlands.

Mest lesið


Fleiri fréttir

Sjá meira


×

Mest lesið