Mikið af hryllilegu fólki sveik mig

X Factor-stjarnan Leona Lewis er yfirleitt mjög pen og kurteis en hún talar út í viðtali við The Independent. Í viðtalinu segir hún farir sínar ekki sléttar í bransanum.

Leona sigraði í X Factor árið 2006 og segir það ekki alltaf hafa verið auðvelt að koma sér áfram í tónlistargeiranum.

"Ég hef hitt mikið af hryllilegu fólki síðustu sex ár sem hafa gert slæma hluti. Ég hef séð þetta fólk svíkja traust mitt. En ég hef lært mikið af því og ég er betri í því að vita hverja ég á að forðast."

Leona talar þó afar vel um raunveruleikaþáttinn sem gerði hana að stjörnu.

"Ég trúi því að ég hefði getað meikað það í tónlistarbransanum án X Factor. En þetta var frábær grundvöllur sem færði mig á þann stað sem ég er í dag. Ég hlusta ekki á gagnrýni fólks á þáttinn."