Brjóstagjöf er mitt megrunarleyndarmál

Hollywood-leikkonan Isla Fisher prýðir forsíðu Women's Health og opnar sig upp á gátt í viðtali inni í blaðinu.

Þessi ástralska leikkona hætti í sápuóperunni Home and Away og fékk síðan hlutverk í kvikmyndinni Wedding Crashers. Eftir það hlutverk þurfti hún að bíða talsvert lengi eftir næsta verkefni.

"Eftir Wedding Crashers fór ég í þrjár áheyrnarprufur á hverjum degi í tólf mánuði og fékk ekkert að gera. Þá fór ég langt niður. En þegar ég kíki til baka sé ég að þessar myndir sem ég fór í prufu fyrir voru hræðilegar þannig að ég slapp vel."

Leikkonan er afar smágerð en hún á tvö börn, Olive og Elula, með grínistanum Sacha Baron Cohen. Hún segir brjóstagjöf vera hennar aðalvopn í baráttunni við aukakílóin.

"Ég passa það sem ég borða. Ég hafði aldrei áhyggjur af því að losa mig við meðgöngukílóin því brjóstagjöfin brennir kaloríum svo hratt. Brjóstagjöf – það er megrunarleyndarmálið mitt! Það og aðhaldsundirföt. Ég er alltaf í aðhaldsundirfötum þegar einhver hrósar mér fyrir útlitið."