Fyrsta sýnishornið úr Lífsleikni Gillz

Vísir frumsýnir hér fyrsta sýnishornið úr Lífsleikni Gillz. Þáttaröðin hefur verið endurklippt til sýninga í kvikmyndahúsum og verður frumsýnd nú í nóvember. Þættirnir eru framleiddir af Stórveldinu og eru framhald af þáttunum Mannasiðir Gillz sem sýndir voru á Stöð 2 í fyrra. Sem fyrr er það landsliðsmarkvörðurinn Hannes Þór Halldórsson sem leikstýrir.

Fylgst er með nokkrum misheppnuðum gaurum, svonefndum rasshausum, reyna að fóta sig í hinum ýmsu aðstæðum. Pétur Jóhann leikur ástsjúkan stöðumælavörð, Þorsteinn Guðmundsson Íslending sem er með allt niðrum sig í útlöndum, Andri Freyr Viðarsson ofdekrað borgarbarn sem flyst út á land, Hannes Óli Ágústsson mann sem er að stíga sín fyrstu skref út úr skápnum og Hilmar Guðjónsson heigul sem dreymir um það að vera hetja einn daginn.

Þeir klúðra öllu í kringum sig í sprenghlægilegum dæmisögum þar sem Gillz kemur iðulega eins og frelsandi engill og bjargar málunum.

"Þættirnir eru til þess gerðir að létta fólki lundina. Það er því hvalreki fyrir þá sem vilja kitla hláturtaugarnar að Lífsleikni sé á leið í bíó því þetta er fyndnasta íslenska efnið síðan Sódóma var og hét. Ég treysti mér til að henda því fram og er ég þó orðvar maður alla jafna," segir Egill.