Fyrstu myndir úr Lífsleikni Gillz

Fyrstu ljósmyndir af atriðum úr þáttaröðinni Lífsleikni Gillz benda til þess að þar sé mikill hasar og skemmtilegt grín á ferðinni. Þáttaröðin hefur verið endurklippt til sýninga í kvikmyndahúsum og verður frumsýnd nú í nóvember. Hægt er að skoða ljósmyndirnar hér með greininni en fyrsta sýnishornið úr þáttunum verður síðan frumsýnd á Vísi á fimmtudaginn klukkan 11.

Þættirnir eru framleiddir af Stórveldinu og eru framhald af þáttunum Mannasiðir Gillz sem sýndir voru á Stöð 2 í fyrra. Sem fyrr er það landsliðsmarkvörðurinn Hannes Þór Halldórsson sem leikstýrir. "Mannasiðir Gillz var vinsælasta íslenska serían á Stöð 2 í fyrra og Lífsleikni Gillz er einfaldlega betri, það er ekki flóknara en það,“ segir Egill Gillzenegger Einarsson, höfundur og aðalleikari þáttanna.

"Þættirnir eru til þess gerðir að létta fólki lundina. Það er orðið langt síðan að gott gott íslenskt grín var aðgengilegt í kvikmyndahúsum. Það er því hvalreki fyrir þá sem vilja kitla hláturtaugarnar að Lífsleikni sé á leið í bíó því þetta er fyndnasta íslenska efnið síðan Sódóma var og hét. Ég treysti mér til að henda því fram og er ég þó orðvar maður alla jafna,“ segir Egill.

Þættirnir eru uppbyggðir eins og Mannasiðir. Fylgst er með nokkrum misheppnuðum gaurum, svonefndum rasshausum, reyna að fóta sig í hinum ýmsu aðstæðum. Þeir klúðra öllu í kringum sig í sprenghlægilegum dæmisögum þar sem Gillz kemur iðulega eins og frelsandi engill og bjargar málunum.

"Það eru nýir rasshausar í þessari seríu. Pétur Jóhann leikur ástsjúkan stöðumælavörð sem veit ekkert hvernig hann á að haga sér í kringum konur og það er veisla að fylgjast með honum þar. Þorsteinn Guðmundsson bregður sér í líki þessa dæmigerða Íslendings sem fer til útlanda og er með allt niðrum sig. Andri Freyr Viðarsson leikur ofdekrað borgarbarn og tölvunörd sem neyðist til að flytja út á land og þarf að höndla það grjótharða umhverfi. Þá leikur Hannes Óli Ágústsson mann sem er að finna sjálfan sig og stíga sín fyrstu skref út úr skápnum. Loks leikur Hilmar Guðjónsson svo heigul sem dreymir um það að vera hetja einn daginn,“ segir Egill.

"Ég lofa veislu. Það er ekki flóknara. Margir aðrir frábærir leikarar koma einnig fram í þáttunum, það eru hreinlega allir bestu leikarar landsins þarna. Hannes náði því besta úr þeim öllum enda er hann snillingur og einn albesti leikstjóri landsins.“

Sem fyrr segir verður fyrsta sýnishornið úr þáttunum frumsýnt hér á Vísi á fimmtudaginn.