Ég er með bólur

Söngkonan Britney Spears prýðir forsíðu desemberheftis tímaritsins Lucky. Þar opnar hún sig um ýmislegt varðandi sitt daglega líf.

Þó Britney sé ein frægasta kona í heimi segist hún ekki hugsa mikið um útlitið.

"Ég er eiginlega alltaf bara með maskara. Og púður því ég er með bólur," segir Britney sem notar ekkert af ókeypis förðunardótinu sem hún fær sent.

Britney er ekki bara poppstjarna og X Factor-dómari heldur líka móðir drengjanna Sean og Jayden. Britney segist lítið nenna að taka sig til og finnst unnusta hennar, Jason Trawick það fínt.

"Honum er sama þó ég sé alltaf í íþróttagalla. Ég er samt aldrei í sokkum. Ég hata sokka."

Britney segir líf sitt vera ansi venjulegt.

"Ég fer í ræktina. Ég syndi. Ég leik við krakkana, ég elda og vinn í garðinum. Við spilum saman og lesum."