Mjög brugðið vegna fyrirhugaðra árása á lögreglumenn

„Mér er mjög brugðið að heyra þetta, að glæpasamtök, hvort sem það eru þessi glæpasamtök eða einhver önnur, skuli vera að safna upplýsingum um lögreglumenn með jafn skipulögðum hætti og raun virðist bera vitni um," segir Snorri Magnússon, formaður Landssambands lögreglumanna, Lögreglan staðfesti í dag að tilefni lögregluaðgerða í fyrrakvöld gegn meðlimum Outlaws væri rökstuddur grunur um fyrirætlanir meðlima vélhjólagengisins um hefndaraðgerðir gegn einstaka lögreglumönnum og fjölskyldum þeirra.

„Mér er enn meira brugðið að þetta virðist hafa átt að beinast gegn fjölskyldu, mökum og börnum," segir Snorri Magnússon í samtali við Vísi. „Þetta sýnir enn og aftur hversu mikið þjóðfélagslegt mein þetta er," segir Snorri og bætir því við að það sé mikilvægt að allir taki höndum saman um að uppræta slík glæpasamtök.

Snorri segist árum saman hafa bent á atriði sem þyrfti að laga. „Það þarf að fjölga lögreglumönnum, það þarf að efla heimildir lögreglu til forvirkra rannsóknaraðgerða, eins og margítrekað hefur komið fram. Og það þarf að efla varnarviðbúnað lögreglu og þetta kostar allt peninga," segir Snorri Magnússon.

Snorri segir að vert sé að horfa til skýrslu 22. júlí nefndarinnar í Noregi um ástandið sem var þar. „Þar töldu menn að hlutirnir væru í mjög góðum gír og góðu lagi. En svo reyndist alls ekki vera," segir Snorri. „Þar kom það sama til, niðurskurður til löggæslumála, of fáir lögreglumenn og fleira og fleira," bætir Snorri við.

Hann bendir að lokum á að málið snerti ekki einungis öryggi lögreglumanna heldur líka almennings. Fram hafi komið að lögreglumenn í Árnessýslu séu til dæmis farnir að þurfa að velja á milli útkalla vegna þess hversu fáliðaðir þeir eru.