Notar sömu aðferð og Ítalirnir

Te & Kaffi opnaði í vikunni nýtt kaffihús að Aðalstræti 9 við Fógetagarð. Þetta er níunda kaffihús fyrirtækisins en það fyrsta var stofnað árið 1984 í kjallara að Barónsstíg 18. 

Kaffihúsið hefur talsverða sérstöðu því þar verður uppáhellibar þar sem viðskiptavinir geta valið kaffi sem er sér uppáhellt fyrir hvern og einn. Þar er einnig hægt að rista hágæða kaffitegundir í litlum 5 kg ofni. Einnig er þar kaffivél sem er sams konar og notuð er á heimsmeistarmóti kaffibarþjóna og auk þess gömul espresso vél sem notast við yfir 100 ára gamla aðferð við að laga espresso.

,,Þetta er sama aðferð og Ítalirnir notuðu þegar þeir fundu upp hinn himneska espresso drykk,“ segir Halldór Guðmundsson, framkvæmdastjóri Te & Kaffi. Hann segir að bryddað verði upp á fleiri nýjungum á kaffihúsinu. ,,Við ætlum við að bjóða upp á námskeið fyrir almenning og við vonumst til að þau geti orðið vinsæl fyrir einstaklinga og hópa sem vilja læra meira um kaffi og kaffigerð,“ segir Halldór ennfremur.



Teogkaffi.is