500 lögreglumenn gerðu vopn námuverkamanna upptæk

Um fimm hundruð lögreglumenn tóku þátt í umfangsmiklum húsleitum í húsakynnum námuverkamanna í Marikana í Suður-Afríku í morgun. Tólf voru handteknir og gríðarlegt magn vopna, þó aðallega sveðjur og önnur eggvopn, voru haldlögð. Fimm af þeim tólf sem voru handteknir reyndust vera með fíkniefni á sér samkvæmt frétt breska ríkisútvarpsins.

Mikil spenna hefur verið á svæðinu eftir að 34 verkmenn voru drepnir af lögreglunni í fjölmennum mótmælum í ágúst. Alls hafa 45 týnt lífinu vegna launabaráttunnar. Verkamennirnir, sem starfa í platínunámum á svæðinu á vegum fyrirtækisins Lonmin, krefjast mikillar kauphækkunar, eða ríflega helmingshækkun.

Fjöldi verkamanna hefur verið í verkfalli en þeir fara á milli náma og ógna þeim sem neita að taka þátt í verkfallinu með ofbeldi. Námufyrirtækið hefur tekið mjög harkalega á málum, meðal annars hótuðu þeir að reka alla þá sem mættu ekki til vinnu daginn eftir að verkamennirnir voru drepnir í ágúst.

Fyrirtækið hefur boðist til þess að hækka laun verkamannanna um þúsund rand. Nú fá verkamennirnir tæplega hundrað þúsund krónur í laun en krefjast um 180 þúsund krónur íslenskar. Verkamennirnir segja tilboðið móðgun.