Flokksleiðtogi í Kína flúði land með milljarða af illa fengnu fé

Einn af flokksleiðtogum kínverska kommúnistaflokksins er flúinn úr landi með um 3,6 milljarða króna af illa fengnu fé í farteskinu.

Það eru fjölmiðlar í eigu hins opinbera í Kína sem fjalla um þetta mál. Sá sem hér um ræðir heitir Wang Guoqiang en hann var flokksleiðtogi í borginni Fengchdeng í Liaoning héraði í norðausturhluta Kína þegar hann lét sig hverfa með hið illa fengna fé.

Wang tók með sér sem nemur 200 milljónum júan þegar hann flúði land en fjárins hafði hann aflað sér með mútuþægni og ýmissi spillingu í starfi sínu í þágu Kommúnistaflokksins.

Æðsta yfirstjórn flokksins stendur nú fyrir umfangsmikilli herferð til að uppræta spillingu meðal opinberra embættismanna í Kína. Stjórnin hefur lofað almenningi að komið verði í veg fyrir flótta þessara embættismann úr landi og að illa fengið fé þeirra verði endurheimt.

Í sumar kom fram í umfjöllun í blaðinu Global Times að á árunum 1980 til 2010 hafi a.m.k. 4000 spilltir embættismenn flúið frá Kína. Þeir hafi náð að taka með sér sem svarar til 7.200 milljarða króna af illa fengu fé.