Baldock verður í herbúðum ÍBV út ágústmánuð

George Baldock, sem hefur leikið með ÍBV í Pepsi-deild karla að undanförnu mun leika með liðinu út ágústmánuð. Talið var að enski miðjumaðurinn færi af landi brott í þessari viku en Eyjamenn fá að njóta krafta hans í nokkrar vikur til viðbótar. Eyjafréttir greina frá.

Baldock er samningsbundinn MK Dons sem leikur í C-deild á Englandi. Hann hefur leikið vel á þessari leiktíð með ÍBV sem sigraði Íslandsmeistaralið KR, 2-0, á heimavelli í gærkvöld í Pepsi-deild karla. ÍBV er í þriðja sæti deildarinnar með 23 stig, KR er þar fyrir ofan með 27 og FH er efst með 29.