ÖSE samþykkir tillögu Péturs Blöndal

Öryggis- og samvinnustofnun Evrópu samþykkti í gær tillögur frá Pétri Blöndal, þingmanni Sjálfstæðisflokksins, sem miða að því að koma í veg fyrir hringferla peninga með raðeignarhaldi og innistæðulausri eignabólu fyrirtækja.

Öryggis- og samvinnustofnun Evrópu, eða ÖSE, er meðal annars ætlað að efla öryggi, mannréttindi, lýðræði í aðildarríkjunum.

Á árlegu þingi þess í Mónakó um helgina var tillaga Péturs Blöndal, þingmanns Sjálfstæðisflokksins, samþykkt en hún miðar að því að koma í veg fyrir hringferla peninga með raðeignarhaldi, lánveitingum og öðrum hætti, sem gerir fyrirtækjum kleift að blása út eignir sínar án innistæðu.

Pétur segir þetta vera alþjóðlegt vandamál og því sé mikilvægt að reglur séu samræmdar um allan heim. Ekki sé nóg að koma í veg fyrir þessa veilu í einstaka löndum.

Þá má nefna að formaður efnahagsnefndar ÖSE hvatti þingmenn sérstaklega til að fylgja tillögum Péturs eftir heima fyrir en slík hvatningarorð þykja sérstök.

"Það er mjög sérstakt og sýnir það að menn sjá hvað þetta er alvarlegt mál og hvað það er mikilvægt að finna á þessu einhverja lausn," segir Pétur.

Einkum sýndi fulltrúi Breta málinu áhuga og segir Pétur það ánægjuefni því mikilvægt sé að fá stóru þjóðirnar til að sinna þessu máli sem allra fyrst.

Öll ríki Evrópu eiga aðild að ÖSE auk Bandaríkjanna, Kanada, Kasakstan, Kirgisía, Tadsjikistan, Túrkmenistan og Úsbekistan.