Hvernig sem fer ætlar Ari að slá grasið á morgun

„Ég skynja það þannig að ég mun fá betri kosningu en kannanir sýna," segir Ari Trausti Guðmundsson forsetaframbjóðandi sem er bjartsýnn á gengi sitt í kosningunum í dag.

Hann fór ásamt konu sinni að kjósa í Grafarvoginum í morgun. Þau gengu í blíðunni að Íþróttmiðstöðinni og mættu vinsamlegu viðmóti borgarbúa, „þannig var fólk að heilsa okkur og ökumenn að flauta," segi Ari þegar hann lýsir skemmtilegum morgni í Grafarvoginum.

Ari hefur í nógu að snúast í dag, þannig er hann með kosningakaffi á Laugavegi 178, í Skaftfellingabúð, eins og það heitir víst. Svo stefnir hann á að halda kosningavöku á Hótel Borg í kvöld.

Spurður hvort baráttan hafi verið erfið, svara Ari Trausti neitandi. „Þetta hefur alls ekki verið erfiður tími heldur skemmtilegur. Það er mjög merkileg lífsreynsla að standa í þessu," segir hann og bætir við: „Ég hef ekki átt neinar svefnlausar nætur."

Ari viðurkennir hinsvegar að lífsreynslan hafi verið sérstök. „Ég nota orðið súrrealískt yfir þetta, enda skyndilega orðin opinber persóna. Það standa stundum á þér tíu spjót og það þarf svo að vinna úr því öllu saman," útskýrir Ari Trausti.

Spurður hvað hann ætli að gera á morgun, hvernig sem fer, svarar Ari: „Á morgun þarf ég að slá grasblettinn heima og svo þarf ég að fara með töluvert af dóti í endurvinnslu."