Guðni Bergsson hannar tölvuleik

Guðni Bergsson, fyrrum landsliðsmaður í knattspyrnu, kemur þessa dagana að þróun á nýjum knattspyrnuleik. Hlutverk Guðna í þróuninni felst einna helst í því að koma með sjónarhorn reynsluboltans svo leikurinn verði sem raunverulegastur. Um leikinn er fjallað í Viðskiptablaðinu í dag.

Fyrirtækið Digon Games kemur að hönnun leiksins. Hann er sagður fremur hefðbundinn „manager" leikur þar sem spilari stjórnar sínu eigin liði. Nýjungin er í því falin að maður spilar á netinu við annað fólk en ekki við tölvu.

Guðni er meðal fjárfesta í leiknum en auk þess veitir faglega innsýn inn í knattspyrnuheiminn.

Leikurinn er tilbúinn en hefur enn ekki verið gefinn út. Verið er að þróa hann fyrir mismunandi viðmót, en fyrst af öllu má búast við að hann verði gefinn út fyrir Facebook.

Leikurinn verður ókeypis fyrir notendur en tekna verður aflað með þeim hætti að spilarar velja auglýsingar frá alvöru fyrirtækjum fyrir lið sín. Að sögn stjórnarformanns Digon Games hefur þetta tekjumódel vakið mikla athygli leikjaframleiðenda.