Fyrirtækið Thorsil áformar þrjátíu milljarða króna uppbyggingu kísilvers á Bakka og stefnir nú í að tvær slíkar verksmiðjur taki samtímis til starfa við Húsavík eftir þrjú ár.
Thorsil ætlaði upphaflega að reisa verksmiðjuna í Þorlákshöfn og kaupa rafmagn af Orkuveitu Reykjavíkur og var samningsrammi undirritaður um verkefnið fyrir tveimur árum. Þau áform urðu að engu vegna fjárhagsvanda Orkuveitunnar, sem, þegar á reyndi, treysti sér ekki til að útvega orkuna.
Thorsil sneri sér þá til Landsvirkjunar, sem bauð fram orku í Þingeyjarsýslum, og samkvæmt upplýsingum Stöðvar 2 liggja þegar fyrir orkusamningur um 85 megavött en með fyrirvörum, og drög að lóðarsamningi við sveitarfélagið Norðurþing um Bakka. Thorsil er að hefja umhverfismat þessa dagana og miða áformin við að 30 milljarða framkvæmdir hefjist eftir mitt næsta ár og að verksmiðjan taki til starfa árið 2015.
Aðalfjárfestar verða tvö fyrirtæki í efnaiðnaði, annað í Evrópu en hitt í Asíu. 160 framtíðarstörf verða til í fyrirtækinu en 400 manns þarf í vinnu á byggingartíma.
Með þessu stefnir í að tvær kísilverksmiðjur rísi við Húsavík á næstu árum því ráðamenn þýska fyrirtækisins PCC, sem mæta gjarnan á einkaþotu, eru einnig komnir með orkusamning við Landsvirkjun, sömuleiðis með fyrirvara, og vilyrði fyrir lóð á Bakka og eru nokkrum mánuðum á undan Thorsil í undirbúningi.
Þótt báðir hyggist vinna hrákísil verða verksmiðjurnar ólíkar að því leyti að Thorsil hyggst hreinsa kísilmálminn meira. PCC stefnir einnig að því að hefja framkvæmdir á næsta ári og að þeirra kísilver taki til starfa eftir þrjú ár.
Landsvirkjun þarf samtímis að ráðast í smíði virkjana fyrir tugi milljarða króna í Bjarnarflagi og á Þeistareykjum þannig að gangi þetta allt eftir gæti orðið ansi fjörugt í Þingeyjarsýslum frá miðju næsta ári.
Tvö kísilver og tvær virkjanir í pípunum í Þingeyjarsýslum
Tengdar fréttir
Stór dagur fyrir Suðurland, segir bæjarstjóri Ölfuss
Hönnun kísilverksmiðju í Þorlákshöfn og nýrrar virkjunar á Hellisheiði eru komin á fulla ferð en samningsrammi var undirritaður síðdegis. Bæjarstjóri Ölfuss segir þetta stóran dag fyrir Suðurland og Reykjavíkursvæðið enda muni verkefnið hafa gífurleg áhrif.
Húsavík efst á óskalista PCC fyrir kísilver
Ráðamenn þýska félagsins PCC sitja þessa stundina á íbúafundi á Húsavík um kísilmálmverksmiðju en Ísland er nú fyrsti valkostur af þremur sem fyrirtæki hafði til skoðunar. Þeir vonast til að unnt verði að taka ákvörðun eftir sex mánuði og að framkvæmdir hefjist á árinu 2013.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
