Skjaldborg hafin á Patreksfirði

Heimildarmyndahátíðin Skjaldborg á Patreksfirði hófst í gærkvöldi. Opnunarmynd hátíðarinnar var Hreint hjarta eftir Grím Hákonarson en hún fjallar um sér Kristinn Friðfinnsson, sóknarprest á Selfossi, sálgæslu hans við sóknarbörn og útistöður við kirkjuyfirvöld.

Veður setti strik í reikninginn þar sem aflýsa þurfti flugi til Bíldudals. Að sögn Janusar Braga Jakobssonar, eins af aðstandendum hátíðarinnar, tókst að vinna bílfar fyrir þá sem áttu far með flugi.

Hátt í 200 gestir voru komnir á hátíðina í gær og er von á fleirum í dag.

Þrátt fyrir úrhelli lögðu margir hátíðargestir leið sína á Sjóræningjahúsið að lokinni sýningu og gerðu sér glaðan dag. Dagskrá Skjaldborgar hófst í morgun en í kvöld verður dagskráin tileinkuð heiðursgesti hátíðarinnar í ár, danska leikstjóranum Max Kester.

Sýndar verða tvær myndir eftir hann á morgun og ræðir hann við áhorfendur að þeim loknum.

Nánari upplýsingar um hátíðina má finna á heimasíðu hátíðarinnar, Skjaldborg.com