Liam Gallagher: Maradona tók í hönd Guðs

Rokkstjarnan Liam Gallagher stal senunni á fundi með fréttamönnum eftir 1-0 sigur Manchester City gegn Manchester United í ensku úrvalsdeildinni í gær. Tónlistarmaðurinn úr hljómsveitinni Oasis er harður stuðningsmaður Man City og hann gerði sér lítið fyrir eftir leikinn og settist í stól sem ætlaður var Roberto Mancini knattspyrnustjóra Man City á fréttamannafundinum eftir leik. Og þar lét hann allt flakka.

„Ferguson hlýtur að hafa fengið sér aðeins of mikið viskí," sagði Gallagher og hrósaði Mancini í hástert. „Ég elska Mancini, hann er næstum því eins svalur og ég," bætti hann við og yfirgaf svæðið. Á leiðinni út mætti hann fyrirliða Man City Vincent Kompany sem skoraði sigurmarkið. Gallagher faðmaði belgíska landsliðsmanninn og sagði „Lifi Belgía".

Á twitter síðu Gallagher má sjá mynd þar sem hann er að heilsa Diego Maradona sem var einnig á leiknum. Sjálfstraustið lekur af Gallagher í myndatextanum þar sem hann skrifaði; „Maradona tekur í hönd Guðs."