Rotaður svartbjörn féll í faðm lögreglumanna

Lögreglumenn í bænum Conway í Arkansas þurftu að leita óhefðbundinna ráða þegar svartbjörn klifraði upp í tré í miðjum bænum og neitaði að koma niður.

Svartbjörninn, sem var nefndur Foster í höfuðið á götunni sem umrætt tré er við, þvertók fyrir að fara niður úr trénu þegar lögreglumenn mættu á staðinn.

Lögregluþjónarnir gripu því til þess ráðs að setja uppblásnar dýnur fyrir neðan tréð og skjóta Foster með róandi lyfjum.

„Hann rann til og frá," sagði Le Tresha Woodruff, talskona lögreglunnar í Conway. „Við héldum að hann myndi falla aftur á bak og lenda á jörðinni. Sem betur fer tókst Foster að rétta sig af."

Loks rotaðist Foster. Hann féll þó ekki strax niður og þurftu lögreglumennirnir því að leita til slökkviliðsins til að ná honum niður. Slökkviliðsmennirnir sprautuðu vatni á björninn þangað til að hann féll.

Foster, sem er eins árs gamall, slasaðist ekki við fallið. Fjöldi fólks hafði safnast saman til að fylgjast með atburðarrásinni og var því ákaft fagnað þegar Foster féll af greininni.