"Charlie Bit Me" rakar inn peningum

Fimm ár eru liðin síðan myndbandið „Charlie Bit Me" birtist á YouTube. Síðan þá hefur verið horft á myndbandið 436 milljón sinnum. Piltarnir og fjölskylda þeirra hafa hagnast gríðarlega á myndbandinu. Foreldrarnir hafa þó reynt að halda piltunum á jörðinni.

Í myndbandinu má sjá hugljúft augnablik úr lífi Carr-fjölskyldunnar. Bræðurnir Harry og Charlie leika sér í hægindastól. Harry ögrar bróður sínum með því að veifa puttanum sínum fyrir framan hann - Charlie litli stenst ekki mátið og bítur í fingurinn.

Faðir bræðranna, Howard Davies-Carr ákvað að setja myndbandið á YouTube svo að skyldmenni þeirra gætu skemmt sér yfir atvikinu. Eftir nokkrar vikur var búið að horfa á myndbandið 200 sinnum. Howard ákvað að hafa myndbandið ögn lengur á síðunni.

„Ég fór á YouTube til að taka myndbandið af síðunni," sagði Howard í viðtalið við ABC fréttastofuna. „Allt í einu var búið að horfa á myndbandið nokkur þúsund sinnum. Hvaða fólk var eiginlega að horfa á þetta?"

Það var ekki fyrr en myndbandið hafði fengið rúmlega 50 milljón áhorf þegar Howard var bent á að hann gæti fengið auglýsingatekjur í gegnum myndbandið.

Carr-fjölskyldan hefði allt eins getað unnið í happdrætti. Þau hafa þénað rúmlega hálfa milljón dollara á myndbandinu.

„Charlie Bit Me" er talið það fyrsta sinnar tegundar. Á síðustu fimm árum hefur fjöldi myndbanda sprottið fram og náð gríðarlegum vinsældum á veraldarvefnum.

Brot úr myndbandinu hafa birst í auglýsingum víða um heim og það er jafnvel til sérstakt smáforrit sem byggir á myndbandinu. Barnabækur byggðar á bræðrunum eru einnig á leiðinni.

Foreldrar Harry og Charlie hafa þó reynt að halda piltunum í ákveðinni fjarlægð frá myndbandinu. Þannig hafa bræðurnir engan skilning á því hversu vinsælt myndbandið er í raun. Hagnaðurinn sem fengist hefur af myndbandinu hefur farið í sérstakan skólasjóð fyrir piltana.

Hægt er að sjá myndbandið hér fyrir ofan.