Jóhanna Sigurðardóttir: Rammaáætlun vonandi afgreidd á næstu dögum

Flokkstjórnarfundur samfylkingarinnar hófst klukkan níu í morgun í Rúgbrauðsgerðinni í Reykjavík. Fundurinn hófst á ávarpi Jóhönnu Sigurðardóttur forsætisráðherra.

Í ræðu sinni gerði hún meðal annars fyrirhuguð lög um nýtt fiskveiðistjórnunarkerfi að umtalsefni auk rammaáætlunar.

Þingflokkur Samfylkingar er reyndar klofinn í afstöðu sinni til virkjana í Þjórsá. Til stóð að lokaútgáfa rammaáætlunar um verndum og nýtingu Þjórsár yrði lögð fyrir ríkisstjórnina í gær, en hætt var við á síðustu stundu þar sem Samfylkingin var ekki reiðubúin til að taka lokaafstöðu. Bæði Fréttablaðið og Morgunblaðið fjalla um málið á forsíðu í dag.

Rammaáætlunin er því enn á borði iðnaðarráðherra. Til stendur að taka málið upp á þingflokksfundi Samfylkingar á mánudag.

Í ræðu sinni sagði Jóhanna um rammaáætlunina: „Rammaáætlunin verður síðan vonandi afgreidd úr ríkisstjórn á næstu dögum. Þau tímamót verða mikið fagnaðarefni, ekki síst fyrir okkur jafnaðarmenn sem höfum í áraraðir talað fyrir málinu. Þetta ferli hefur staðið yfir í mörg ár og munu skipta miklu um að fagleg sjónarmið liggi ávallt að baki ákvörðunum um nýtingu náttúrusvæða eða verndun þeirra.

Rammaáætlunin leggur grunn að gjörbreyttum vinnubrögð í þessum efnum og markar endalok þess tilviljanakennda ákvörðunarferlis í þessum viðkvæmu málum sem einkenndi ríkisstjórnartíð Sjálfstæðisflokks og Framsóknarflokks.

Afgreiðsla málsins hefur sannarlega tafist og hafa ýmsir af því tilefni varað við því að fagleg sjónarmið verði látin víkja fyrir pólitískum."

Þá sagði hún vel koma til greina að fjármálafyrirtækin og samfélagið í heild komi enn frekar til móts við hópa sem urðu illa út úr hruninu og dreifi þannig kostnaði heimilana vegna hrunsins.