Björn Bjarnason dæmdur til að greiða Jóni Ásgeiri miskabætur

Björn Bjarnason fyrrum dómsmálaráðherra var í dag dæmdur í héraðsdómi til að greiða Jóni Ásgeiri Jóhannessyni athafnamanni 200.000 krónur vegna ummæla sinna um Jón Ásgeir í bókinni Rosabaugur yfir Íslandi sem fjallar um Baugsmálið. Þá er honum gert að greiða Jóni Ásgeiri 200 þúsund til þess að standa straum af birtingu dómsins í opinberum fjölmiðli. Hann þarf því að greiða Jóni Ásgeiri alls 400 þúsund krónur fyrir ummælin.

Héraðsdómur dæmdi að tvenn ummæli í bókinni skyldu vera dauð og ómerk. Jafnframt var Birni Bjarnasyni gert að greiða málskostnað Jóns Ásgeirs upp á hálfa milljón króna.

Ummælin sem voru dæmd dauð og ómerk voru: „Hæstiréttur staðfesti niðurstöðuna frá 28. júní um 19. ákæruliðinn um fjárdrátt með þeim rökum að um greinargóða sundurliðun væri að ræða á einstökum kreditreikningum. Var Jón Ásgeir því dæmdur fyrir fjárdrátt og í 3 mánaða skilorðs­bundið fangelsi …"

Það var semsagt rangt að Jón var dæmdur fyrir fjárdrátt.

Hin ummælin voru:

„ … að því er varðaði ákæruliði 11-17 um meiriháttar bókhaldsbrot og rangfærslu staðfesti hæstiréttur niðurstöðu héraðsdóms frá 3. maí um sekt Jóns Ásgeirs …"

Í niðurstöðu dómsins segir: „Við ákvörðun viðurlaga verður að líta til þess að stefndi hefur leiðrétt um­mælin á áberandi hátt og beðið stefnanda afsökunar á þeim. Það leiðir hins vegar ekki til þess að hann verði sýknaður af kröfum stefnanda."