Sólstormurinn sló út stuttbylgjusambandið við útlönd

Mjög öflugur sólstormur ríður nú yfir jörðina en hann hefur valdið ýmsum truflunum á fjarskiptum víða um heiminn, þar á meðal hér á landi. Stuttbylgjusambandið við útlönd og innanlands sló út vegna stormsins.

Stormur þessi stafar frá risavöxnu sólgosi sem varð á sólunni seint á þriðjudag. Vísindamenn segja að um sé að ræða öflugasta sólstorminn á síðustu fimm árum og að kraftur hans fari vaxandi.

Strax aðfararnótt miðvikudagsins olli stormurinn truflunum. Jónas Bjarnason formaður félags Íslenskra Radíóamatöra segir að miklar truflanir hafi orðið á stuttbylgjusambandinu innanlands og við útlönd frá þeim tíma og það samband hafi raunar meir og minna slegið út.

Þá hefur stormurinn valdið miklum truflunum á segulsviði jarðar eins og glöggt má sjá á mælitækjum háloftadeildar raunvísindastofnunnar Háskólans í Leirvogi.

Áhrif stormsins eru í þremur þrepum og það alvarlegasta þeirra, svokallað plasmaský, er nú skollið á jörðina. Sökum þess má reikna með truflunum á raforkukerfum, GPS staðsetningartækjum og flugferðum. Flugfélög forðast flugferðir yfir bæði Suður- og Norðurpólinn í augnablikinu. Þá er hætta á að stormurinn skaði stjórntæki gervihnatta á braut um jörðu.

Hið jákvæða í þessu öllu er að að búast má við kraftmiklum og litríkum Norðurljósum af völdum stormsins ef heiðskírt verður í kvöld.