Viggó Þór dæmdur í tveggja ára fangelsi

Viggó Þór Þórisson, fyrrverandi framkvæmdastjóra Verðbréfaþjónustu Sparisjóðanna (VSP), var dæmdur í tveggja ára óskilorðsbundið fangelsi fyrir tilraun til fjársvika í Héraðsdómi Reykjaness í morgun. Hann var aftur á móti sýknaður af ákæru um stórfelld umboðssvik.

Rannsókn málsins hófst vegna gruns um stórfelld efnahagsbrot Viggós meðan hann var framkvæmdastjóri Verðbréfaþjónustu Sparisjóðanna. Brotin voru talin felast í útgáfu tilhæfulausrar ábyrgðaryfirlýsingar upp á 200 milljónir Bandaríkjadala, jafnvirði 22 milljarða króna.

Málið hefur verið til rannsóknar síðan árið 2007.

Í niðurstöðu héraðsdóms segir að við ákvörðun refsingar Viggós ber að líta til einbeitts brotavilja hans, og að um afar háar fjárhæðir var um að tefla. Þá er litið til þess að verknaður Viggós leiddi til þess að starfsemi VSP var lögð niður og bú félagsins gefið upp til gjaldþrotaskipta.

Á hinn bóginn er til þess að líta að tilraunir Viggós til blekkinga voru mjög veikburða og ósannfærandi í ljósi þess að þær beindust að fagfjárfestum og bankastofnunum.