Suarez: Ekki allt sem sýnist

Luis Suarez segist vera vonsvikinn eftir tap sinna manna í Liverpool gegn Manchester United í dag. Úrslitin hafa þó fallið í skuggann á máli hans og Patrice Evra.

Suarez er nýbúinn að taka út átta leikja bann fyrir að vera með kynþáttaníð í garð Evra. Fyrir leikinn virtist hann neita að taka í hönd Evra og hunsa hann algjörlega.

„Við töpuðum og eru daprir því við lögðum okkur mikið fram," skrifaði hann á Facebook-síðuna sína. „Þetta eru vonbrigði því ekki er allt sem sýnist."

Ýmsar kenningar eru á lofti á internetinu um að það hafi í raun verið Evra sem dró hönd sína í þann mun sem Suarez nálgaðist. Sýnist sitt hverjum í þeim efnum.