Stebbi Hilmars vill sönglagakeppni fyrir Norðurlöndin

„Ég hef lengi verið á því að það væri fín hugmynd að halda samnorræna sönglagakeppni, hafa Færeyjar líka með, 2-3 lög frá hverju landi, jafnvel fleiri. Eurovision er orðið of mikið monster," segir Stefán Hilmarsson, tónlistarmaður á Facebook-síðu sinni.

Páll Óskar Hjálmtýsson sagði í pistli á Facebook-síðu sinni í gærkvöldi að Ísland ætti að draga sig út úr keppninni vegna mannréttindabrota í Bakú, höfuðborg Aserbaídjan, þar sem keppnin er haldin í ár. Nýjasta dæmi um þau er að íbúar í borginni hafa verið reknir af heimilum sínum og þau jöfnuð við jörðu. Þetta er gert til þess að hægt sé að byggja tónleikahöll fyrir keppnina. Páll Magnússon, útvarpsstjóri, sagði í viðtali á Vísi í dag að engin ákvörðun hefði verið tekið um það hvort að Ísland hætti við þáttöku í keppninni.

Stefán Hilmarsson, sem tók þátt fyrir Íslands hönd í keppninni með laginu „Nína" árið 1991,segir að sniðugt væri að halda bara samnorræna sönglagakeppni. Hann segir að Eurovision sé orðið of mikið monster, eða skrímsli.

„Auk þess eru eystri lönd álfunnar orðin mjög dómínerandi, svo ekki sé minnst á menningar-, félags- og stjórnarfarslega þætti. Enda er það hvort eð er svo, að austrið kýs jafnan með austrinu og Norðurlöndin kjósa jafnan hvort annað. Samnorræn keppni yrði viðaminni, ódýrari og stæði þátttökuþjóðum nærri hug og hjarta. Ég held aukin heldur, með fullri respekt, að slík keppni yrði líklegri til að kveikja áhuga sterkra höfunda sem margir hafa misst áhugann hin seinni ár. Það væri hægt að rótera gestgjafahlutverkinu, stærri löndin tækju ca. tvær keppnir á móti einni hjá minni löndunum, Ísland myndi hosta ca. á 10 ára fresti. Sjö manns í málið," segir Stefán á Facebook-síðu sinni.