Ný framboð hugnast kjósendum vel

Markaðsrannsóknafyrirtækið MMR hefur kannað afstöðu fólks til þess að kjósa nokkur ný stjórnmálaöfl sem annaðhvort hafa lýst yfir framboði eða rætt hefur verið um að mæti til leiks fyrir næstu kosningar. Svo virðist sem Íslendingum hugnist ágætlega að kjósa eitthvað nýtt í næstu kosningum en 52 prósent þeirra sem taka afstöðu segja eitthvert framboðanna sem nefnt var koma til greina sem valkostur við næstu kosningar.

„Lítill munur reyndist á fjölda þeirra sem sagði það koma til greina að kjósa einstök framboð (að Hægri-grænum undanskyldum)," segir í tilkynningu frá MMR. „Um og yfir 23% þeirra sem tóku afstöðu sögðu það koma til greina að kjósa Bjarta framtíð (undir forystu Guðmundar Steingrímssonar og Besta flokksins), nýtt framboð undir forystu Ólafs Ragnars Grímssonar eða nýtt framboð undir forystu Lilju Mósesdóttur. Öllu færri, eða 5,6% þeirra sem tóku afstöðu, sögðu það koma til greina að kjósa Hægri-græna (undir forystu Guðmundar Franklín Jónssonar)."

MMR bendir á að athyglivert sé að skoða niðurstöðurnar út frá stuðningi fólks við gömlu flokkana. „Ber þar hæst að af þeim sem að öðrum kosti myndu kjósa Samfylkinguna nú voru 60,0% sem sögðu eitthvert ný-framboðanna fjögurrra koma til greina. Munaði þar mest um að 47,5% stuðningsfólks Samfylkingarinnar sagði að framboð Bjartrar framtíðar kæmi til greina. Sé litið til annarra stjórnmálaflokka má nefna að 49,2% Framsóknarmanna töldu að eitthvert framboðanna kæmu til greinar og þá helst nýtt framboð undir forystu Ólafs Ragnars Grímssonar (37,9%). Af kjósendum Vinstri-grænna voru 38,7% sem sögðu eitthvert framboðanna koma til greina, einkum Björt framtíð (21,5%) og nýtt framboð undir forystu Lilju Mósesdóttur (19,2%). Þá voru 31,7% Sjálfstæðismanna sem sögðu að eitthvert framboðanna koma til greina og þá helst möguleg ný-framboð Lilju Mósesdóttur (15,4%) eða Ólafs Ragnars Grímssonar (14,9%)."