Tillagan dregin til baka

„Við féllum frá henni, það var í rauninni búið að ná fram tilgangnum að okkar mati," segir Andrés Jónsson, sem var einn af níu flutningsmönnum tillögu um að flýta landsfundi flokksins fram á vor. Flutningsmennirnir drógu tillöguna til baka síðdegis í dag.

Hann segir að tilgangurinn með tillögunni hafi verið að skapa umræðu um forystumálin og hvernig flokkurinn stæði fyrir næstu kosningar. „Tilgangurinn var ekki að sprengja þessa stjórn eða koma í veg fyrir að Jóhanna gæti verið forsætisráðherra út kjörtímabilið. Heldur var hann að opna þessa umræðu sem er brýn - hvernig við ætluðum að stilla upp og hvað við ætluðum að bera fram til að fá umboð þjóðarinnar í næstu kosningum," segir hann.

Þá hafi ýmsir flokksmenn komið að orði við þá og beðið þá um að draga tillöguna til baka og taka ákvörðun á víðari vettvangi.