Fárviðri spáð suðaustur af landinu

Fárviðri er spáð suðaustur af landinu, og er veðrið þegar farið að versna. Búist er við að ölduhæð fari upp í allt að fjórtán metra , sem jafngildir fjögurra til fimm hæða fjölbýlishúsi og að vindur verði 35 metrar á sekúndu.

Veðrustofan og Vaktstöð siglinga hvetur sjófarendur til að sýna ítrustu varúð, enda hafa fiskiskip streymt af svæðinu til hafna í nótt.

Vitað er um stórt olíuskip og eitt flutningaskip á leið frá landinu á þessu hafsvæði og verður sérstaklega fylgst með þeim, og skip hafa leitað vars við Færeyjar.

Þá er búist við stormi á sunnan og austanverðu landinu í dag og að ekkert ferðaveður verði um tíma.