Sveitarfélögum verði ekki skylt að greiða sumarleyfisferðir húsmæðra

Bæjarráð Hafnarfjarðar telur það ekki vera í verkahring sveitarfélaga að greiða sumarleyfisferðir fyrir heimavinnandi húsmæður, eins og þeim er nú skylt að gera samkvæmt lögum.

Umrædd lög um orlof húsmæðra eru frá árinu 1972 og telur bæjarráðið að þau séu úrelt og ekki í samræmi við gildandi lög um jafna stöðu og jafnan rétt kvenna og karla, nútíma jafnréttissjónarmið og jafnréttisáætlun Hafnarfjarðarbæjar. Engu að síður gekk bæjarráð Hafnarfjarðar að kröfu orlofsnefndar húsmæðra í Hafnarfirði sem tekin var til afgreiðslu á fundi bæjarráðsins þann 12. janúar síðastliðinn.

Ríkisstyrkt húsmæðraorlof má rekja aftur til 1958 þegar sérstök fjárveiting var samþykkt vegna orlofs og sumardvalar húsmæðra frá barnmörgum heimilum. Hafði verið talað fyrir slíku fyrirkomulagi frá því 1944, en orlof fyrir almenna launþega var lögfest árið 1943. Það var svo árið 1960 sem lögfest voru lög um orlof húsmæðra, en tilgangur þeirra var að lögfesta viðurkenningu á þjóðfélagslegu mikilvægi ólaunaðra starfa og veita húsmæðrum orlofsréttindi líkt og launþegum. Lögin gerðu ráð fyrir því að ríkissjóður og sveitarfélög veittu fé til sérstakra orlofsnefnda sem síðar skipulegðu orlof húsmæðra og veldu þátttakendur í samræmi við lög um húsmæðraorlof.

Bæjarráð Hafnarfjarðar segir að ekki megi gera lítið úr þeim félagslegu áhrifum sem orlofsferðir húsmæðra hafi haft fyrir þær konur sem þær hafi farið. „Verði lögin afnumin geta orlofsnefndirnar haldið áfram að skipuleggja ferðir kjósi þær svo. Aðkoma sveitarfélaganna yrði valkvæð og það sem mestu máli skiptir, íbúum væri ekki mismunað á grundvelli kynferðis," segir í tilkynningu frá bæjarráði.