Alltaf rólegur nema þegar hann talar um lögmenn

Maðurinn sem réðist inn á lögmannsstofuna Lagastoð í gær og veitti framkvæmdastjóra stofunnar lífshættulega áverka var í dag úrskurðaður í gæsluvarðhald fram á föstudag. Hann er sagður hafa óbeit á lögmönnum.

Árásarmaðurinn Guðgeir Guðmundsson, fæddur 1977, var í morgun leiddur inn í Héraðsdóm Reykjavíkur þar sem gæsluvarðhalds var krafist yfir honum. Hann huldi ekki andlit sitt á leiðinni inn í dómhúsið og var yfirvegaður að sjá. Hann játaði verknaðinn.

Fréttastofa hefur rætt við vini, samstarfsmenn og kunningja Guðgeirs í dag og eiga þau það sammerkt að bera honum vel söguna og enginn hefur skilning á hvernig eitthvað þessu líkt hafi getað gerst. Guðgeir hefur starfað á sama vinnustað í sjö ár og hefur þótt góður starfskraftur. Honum er lýst sem geðgóðum og hlédrægum manni, sem hafi á sínum fullorðinsárum alltaf búið einsamall.

Hann er af heimildarmönnum fréttastofu ekki talinn einangraður félagslega en hann hefur æft bogfimi með Íþróttafélagi Fatlaðra í Reykjavík, þótt ófatlaður sé. Að sögn heimildarmanna hefur ekki borið á breytingu á hegðun hans undanfarið, hann hafi ávallt verið hinn rólegasti nema þegar kemur að tali um lögmenn, en þeirri starfsstétt hefur hann lengi haft óbeit á og haft það á orði í vitna viðurvist.

Dómari úrskurðaði í morgun Guðgeir í gæsluvarðhald fram á föstudag og einnig er honum gert að sæta geðrannsókn.

Hann sýndi engin svipbrigði þegar hann var leiddur út úr dómhúsinu.

Framkvæmdastjóri Lagastoðar sem slasaðist lífshættulega í árásinni liggur enn þungt haldinn á gjörgæsludeild Landspítalans. Hann gekkst undir umfangsmikla aðgerð í gær og er haldið sofandi í öndunarvél.