Fjarstæðukenndar ásakanir

Samtök fjármálafyrirtækja (SFF) telja ásakanir Hagsmunasamtaka heimilanna um lögbrot fjarstæðukenndar - en Hagsmunasamtökin hafa óskað eftir tafarlausri rannsókn á aðkomu SFF að samráði bankanna um gengisdóma.

Þegar útreikningar á fyrrverandi gengislánum komust enn eina ferðina í uppnám eftir Hæstaréttardóm í febrúar - ákvað Samkeppniseftirlitið að veita fjármálafyrirtækjum undanþágu frá samkeppnislögum og leyfa þeim að hafa samráð um að leysa úr gengislánaflækjunni í eitt skipti fyrir öll.

Undanþágan var ýmsum skilyrðum háð. Þar á meðal var skýrt að Samtök fjármálafyrirtækja máttu ekki taka þátt í þessu samstarfi - að öðru leyti en því að útvega fundarritara og vinnuaðstöðu. Einungis bankar og bílalánafyrirtæki sem veittu gengislán máttu taka þátt.

Hagsmunasamtök heimilanna telja að Samtök fjármálafyrirtækja hafi hins vegar brotið gegn þessari undanþágu - og verið beinn þátttakandi í samráðinu. Því hafa þau óskað eftir tafarlausri rannsókn Samkeppniseftirlitsins á málinu. Formaðurinn sagði í hádegisfréttum að samráðsferlið væri ónýtt. Örn Arnarson, sérfræðingur hjá Samtökum fjármálafyrirtækja, vísar öllum ásökunum samtakanna á bug, og segir SFF á engan hátt hafa verið beinir þátttakendur í samráðsferlinu. Þá telur hann fráleitt að samráðsferlið sé hannað til hagsbóta fyrir fjármálafyrirtækin. Ekki sé hægt að hanna niðurstöðu dómstóla.