Einn stunginn í lærið annar í andlitið

Maður var stunginn í lærið með hníf í Tryggvagötu í Reykjavík um hálfþrjúleytið í nótt og var hann fluttur á slysadeild. Skömmu síðar stöðvaði lögregla bíl í Lækjargötu og tók eftir því að einn farþeganna var með stungusár í andliti.

Honum var komið undir læknishendur. Engar nánari upplýsingar hafa verið gefnar um hversu alvarleg meiðsli mannanna eru og getur lögreglan að svo stöddu ekki sagt til um hvort að málin tengjast en þau eru í rannsókn.

Ekið var á bíl á Hringbraut til móts við umferðarmiðstöðina BSÍ rétt fyrir miðnætti í nótt með þeim afleiðingum að hann kastaðist á aðra bifreið. Ökumaðurinn sem olli óhappinu er grunaður um ölvun við akstur og var hann fluttur í fangageymslu þar sem hann gistir nú.

Einn var fluttur á slysadeild eftir að hópslagsmál brutust út fyrir utan veitingastaðinn Spot í Kópavogi um hálffjögur í nótt. Þá var tilkynnt um skemmdir á bifreið við Vodafonehöllina og var lögregla snögg að finna tjónavaldinn.