Bæjarsjóður greiddi fyrir kosningaáróður

Hafsteinn Karlsson, forseti bæjarstjórnar Kópavogsbæjar og bæjarfulltrúi Samfylkingarinnar, segir það alvarlegt mál ef fulltrúi Sjálfstæðisflokksins hefur viljandi látið bæjarsjóð greiða fyrir kynningarefni í kosningabaráttunni árið 2006. „Ég þvertek ekki fyrir að reikningurinn hafi óvart farið þangað. Það er þá mjög óheppilegt," segir Hafsteinn í samtali við Vísi. „En ef þetta er gert viljandi þá er það alvarlegt mál," segir hann.

Hafsteinn ritaði bréf í Morgunblaðið 10. febrúar þar sem hann sagði að til væru skýrar vísbendingar um að bæjarsjóður Kópavogs hafi greitt fyrir efni sem Sjálfstæðisflokkurinn notaði í kosningabaráttu sinni. Jóhann Ísberg, formaður Sjálfstæðisfélags Kópavogs, birti síðan í gær bréf í Morgunblaðinu þar sem hann skoraði á Hafstein að standa við stóru orðin og upplýsa hvað hann eigi þarna við.

Hafsteinn segir að í skjalasafni Bæjarskipulagsins sé glærusýning sem ber nafnið „Það besta fyrir Kópavog." Hún var unnin vorið 2006 og greidd af bæjarsjóði. Í glærunum er talað um „kosningastefnuna okkar" og rætt sérstaklega um „framkomu Samfylkingarinnar" í Gustsmálinu.

Í Morgunblaðinu í dag ritar Hafsteinn: „Enginn starfsmaður Bæjarskipulags notaði þessa kynningu eða óskaði eftir því að hún yrði gerð enda hefur Skipulagið aldreið verið með kosningastefnuskrá."

Kynningarefnið kostaði bæjarsjóð 187.500 krónur.

Í samtali við Vísi segir Hafsteinn enga ástæðu til að tengja þessar gjörðir við Sjálfstæðisflokkinn í heild sinni og er hann hreinlega ánægður með að formaður Sjálfstæðisfélagsins kannast ekki við málið.

„Ég held að þáverandi bæjarstjóri þurfi að svara fyrir þetta," segir Hafsteinn en bæjarstjóri Kópavogs á þessum tíma var Gunnar I. Birgisson.

Hafsteinn telur líklegt að glærusýningin hafi verið notuð á kynningarfundum þar sem bæjarstjórinn fór yfir stefnumál Sjálfstæðisflokksins.

Hafsteinn segist aðspurður að málið hafi ekki verið rætt innan bæjarstjórnar enda sé þarna um að ræða upplýsingar sem eru tiltölulega nýkomnar fram.