Gekk á milli manna á Kringlukránni og stal veskjum

Nóttin var tiltölulega róleg hjá lögreglunni á höfuðborgarsvæðinu í gærkvöldi og í nótt. Tvær minniháttar líkamsárásir voru tilkynntar í miðbænum og leitaði annar tjónaþolinn aðstoðar á slysadeild.

Þrír voru teknir ölvaðir við akstur, og var einn af þeim próflaus og ók á 120 kílómetrahraða þar sem er 80 kílómetra hámarkshraði.

Fjórir gistu fangageymslur, þrír vegna ölvunar og einn vegna þjófnaðarmáls á Kringlukránni í gær. Maðurinn gekk á milli gesta og stal veskjum. Starfsmenn veitingastaðarins urðu varir við athæfi mannsins og héldu honum þegar til lögregla mætti á vettvang.