Lögmaður segir að Alþingi hafi gert innheimtuaðilum mun auðveldara en áður að setja einstaklinga og fyrirtæki í gjaldþrot með lagabreytingum á síðasta ári.
Lögmaðurinn Tryggvi Agnarsson var verjandi fyrirtækis sem fékk kröfu um gjaldþrotaskipti hafnað nú fyrir helgi, líkt og fréttastofa greindi frá í gær. Hann segir að við breytingar á gjaldþrota- og aðfararlögum síðasta sumar hafi Alþingi gert innheimtuaðilum auðveldara og fljótlegra að gera menn gjaldþrota.
Hann tiltekur einkum tvennar breytingar. Annarsvegar sé nú hægt að gera árangurslaust fjárnám án þess að gerðarþolinn mæti til sýslumanns, sem ekki var hægt áður.
„Það byggðist auðvitað á því að það var nauðsynlegt að vita um þína eignastöðu, þú áttir að geta tjáð þig um hana þar," segir Tryggvi. „Svo breyta menn lögunum þannig að ef þú mætir ekki, þá er hægt að gera árangurslausa aðför hjá þér, og biðja um gjaldþrot á þínu búi á þeim grundvelli. Það var gert miklu þægilegra fyrir rukkarann, og fljótlegra, að setja þig á hausinn."
Hins vegar sé nú hægt að krefjast gjaldþrotaskipta ef skuldari verður ekki við áskorun lánardrottins um að lýsa yfir getu sinni til að greiða lán sín.
„Þá segir bara bankinn við þig; við erum hér með kröfu á þig sem hljóðar upp á einhverja upphæð. Nú hefurðu tvær vikur til að borga, og ef þú lýsir því ekki yfir að þú getir borgað eða borgar, þá getum við farið með þig í gjaldþrot," segir Tryggvi til útskýringar.
Þetta sé fljótlegra en áður var, og bankarnir hafi nýtt sér þetta úrræði í stórum stíl.
„Sannleikurinn er sá að það er búið að setja hundruð, ég skal ekki segja þúsundir, en allavega hundruð fyrirtækja og einstaklinga á hausinn með þessum heimildum - meira eða minna á grundvelli ólögmætra og vitlaust reiknaðra lána"
Tryggvi gagnrýnir Alþingi harðlega vegna þessara breytinga.
„Ég spyr nú bara; hvernig í ósköpunum getur þetta gerst?" segir Tryggvi að lokum.
Arsenal
Leeds
