Betur reknir skólar og öflugra starf er markmiðið

Jón Gnarr borgarstjóri segir að markmiðið með sameiningaráformum í skólum og leiksskólum borgarinnar sé að ná fram betur reknum skólum og öflugra skólastarfi. Sameiningaráformin verða að öllum líkindum samþykkt í borgarstjórn síðar í dag en borgarráð samþykkti tillöguna í gær. Jón Gnarr bendir á að ekki sé verið að loka húsnæði og að ekki sé um að ræða breytingar á öllu skólastarfi í Reykjavík. Fyrst og fremst sé um að ræða hagræðingu og sparnað í yfirstjórn.

Með breytingunum segir Jón unnt að spara um 300 milljónir króna á næsta ári og rúman milljarð á næstu þremur og hálfa ári. Borgarstjóri segist hafa heyrt það frá flestum íbúum borgarinnar sem hann hafi rætt málið við að skilningur sé á því að það þurfi að spara. Fólki hafi hinsvegar fundist málið unnið með of miklum hraða og kvörtuðu margir yfir skorti á samráði. Jón Gnarr segist hinsvegar viss um að með þeim breytingum sem gerðar hafi verið á upprunalegu tillögunum hafi verið komið til móts við athugasemdir sem bárust.

Þá fór borgarstjóri yfir hina tillöguna sem til umræðu er í borgarstjórn í dag en það að hefja undirbúning að sameiningu leikskólasviðs og menntasviðs auk þess sem verkefni sem nú eru á skrifstofu tómstundamála á íþrótta- og tómstundasviði verði færð á þetta sameiginlega svið.

Jón segir að börn og ungmenni eigi að vera í fyrirrúmi í allri þjónustu og stefnt skuli að því að skipulagning skólastarfsins verði heildstæðari og henti börnum og foreldrum sem best. Rekstrarlegur ávinningur skóla og frístundaheimila sé einnig óumdeilanlegur. Þá eigi ekki að skipta máli undir hvaða svið menn heyri, heldur þurfi borgarbúar að taka höndum saman og búa til það besta úr sameinuðum sviðum.

Að lokum þakkaði borgarstjóri sviðstjórum fyrir gott starf í gott starf í þágu borgarinnar í gegnum árin og starfsfólki og íbúum Reykjavíkur óskaði hann gleðilegra páska.