Tónleikum Rihönnu frestað - "Þetta var tilfinningalegur rússíbani"

„Það var mikið af yngri stelpum þarna með mömmum sínum sem voru alveg hágrátandi," segir Hildur Guðný Káradóttir, háskólanemi, sem flaug af landi brott fyrir helgi til þess að fara á tónleika með söngkonunni Rihönnu í Malmö í Svíþjóð í kvöld. Þegar hún mætti á svæðið, ásamt vinkonum sínum, var þeim tjáð að tónleikunum hefði verið aflýst vegna veikinda hjá Rihönnu.

„Við tókum lestina frá Kaupmannahöfn og vorum orðnar rosalega spenntar. Við komum upp rúllustigann og sáum tónleikahöllina upplýsta. Þegar við löbbuðum upp og ætluðum að fara í röðina til þess að láta rífa af miðunum stendur þar maður með gjallarhorn og segir að tónleikunum hafi verið aflýst," segir Hildur Guðný. „Þetta var tilfinningalegur rússíbani, það komu alveg nokkur tár og svona," segir hún.

Hún segir að það hafi ekki verið gert með neinum fyrirvara og þúsundir aðdáenda söngkonunnar hafi staðið svekktir fyrir utan höllina. „Það var mikið af fólki sem var mjög pirrað og var kannski búið að ferðast langar vegalengdir í lestum og bílum," segir hún.

Margir Íslendingar voru staddir fyrir utan tónleikahöllina segir Hildur Guðný og bendir á að hún hafi heyrt íslensku út um allt. Hún þekki til margra Íslendinga sem hafi keypt sér miða á tónleikana og flogið út til Svíþjóðar eða Danmerkur um helgina bara til þess að sjá söngkonuna með eigin augum.

Hún segist fá miðann endurgreiddan en hún flýgur heim á morgun. „Peningarnir skipta ekki máli, okkur langaði bara að sjá tónleikana. Við erum alveg búnar að eiga góða helgi en tónleikarnir voru aðalástæðan að við komum hingað, þetta er því frekar leiðinlegt," segir hún.

Síðar í kvöld var tilkynnt að Rihanna muni halda aðra tónleika í Malmö en ekki var sagt nánar hvenær það verður. Þá bað söngkonan aðdáendur sína afsökunar á Twitter-síðu sinni í kvöld en hún var lögð inn á sjúkrahús fyrr í dag með flensu.

Hildur Guðný snýr því aftur heim til Íslands án þess að hafa séð Rihönnu, og verður því eflaust að láta myndbönd af tónleikum hennar á Youtube.com nægja að sinni.